ఏపీలో బీజేపీ అధ్యక్షురాలు, ఎంపీ దగ్గుబాటి పురందేశ్వరి కీలక వ్యాఖ్యలు చేశారు. ” BJP Leadership – బీజేపీలో అసాధ్యాన్ని సాధ్యం చేసే నాయకత్వం ఉంది” అని ఆమె గట్టిగా చెప్పారు. ఏపీ బీజేపీ ఆఫీస్‌లో మాజీ ఉప ప్రధాని జగజీవన్ రామ్ జయంతి సందర్భంగా ఆయన చిత్రపటానికి పూలమాల వేసి నివాళి అర్పించారు. ఈ సందర్భంగా ఆమె మాట్లాడుతూ, బీజేపీ చేసిన పనులను గుర్తు చేశారు.
జగజీవన్ రామ్ స్ఫూర్తి
పురందేశ్వరి మాట్లాడుతూ, “జగజీవన్ రామ్ గారు ప్రస్తుత పీడీఎస్ వ్యవస్థకు పునాది వేశారు. ఆయన సేవలు మరుపురానివి” అన్నారు. బీజేపీ నాయకత్వం కూడా అలాంటి గొప్ప పనులు చేస్తోందని చెప్పారు. “మన సైనికులు చనిపోతుంటే, పొరుగు దేశంలోకి వెళ్లి ఉగ్రవాదులను హతమార్చాం. జమ్మూ కాశ్మీర్ భారత్‌లో భాగమని నిరూపించాం” అని గర్వంగా చెప్పుకొచ్చారు.
రామ మందిరం నుంచి ట్రిపుల్ తలాక్ వరకు
“500 ఏళ్ల భారతీయుల కల – రామ మందిరం నిర్మాణం – బీజేపీ సాకారం చేసింది. ట్రిపుల్ తలాక్‌ను రద్దు చేసి ముస్లిం మహిళలకు స్వేచ్ఛ ఇచ్చాం” అని పురందేశ్వరి వివరించారు. ఇంకా, శరణార్థులకు పౌరసత్వం, ఆశ్రయం ఇచ్చిన ఘనత కూడా బీజేపీదేనని గుర్తు చేశారు. ఈ చర్యలు అసాధ్యాలను సాధ్యం చేసినట్టేనని ఆమె అన్నారు.
Also read: బంగారు చీరతో సిరిసిల్ల నేతన్న సేవ!
వక్ఫ్ సవరణ బిల్లు
బీజేపీ నేతృత్వంలోని ఎన్డీఏ ప్రభుత్వం వక్ఫ్ సవరణ బిల్లును పార్లమెంట్‌లో ఆమోదించింది. “ఈ బిల్లు వక్ఫ్ బోర్డును సమర్థవంతంగా చేస్తుంది. మత విషయాల్లో ఎలాంటి మార్పు లేదు” అని పురందేశ్వరి స్పష్టం చేశారు. “భక్తులు ఇచ్చిన భూములు సరిగ్గా వాడుకుంటున్నాయా లేదా అని చూడటానికే ఈ మార్పులు” అని వివరించారు. మోదీ ముస్లిం సంక్షేమం కోసం చేసిన పనులకు ఆమె ప్రశంసలు కురిపించారు.
కాంగ్రెస్‌పై విమర్శలు
2013లో కాంగ్రెస్ ప్రభుత్వం వక్ఫ్ చట్టాన్ని సవరించి, మైనారిటీ బోర్డును బలహీనం చేసిందని పురందేశ్వరి ఆరోపించారు. “వోట్ బ్యాంక్ రాజకీయాల కోసం ముస్లింల మధ్య చీలిక తెచ్చారు” అని విమర్శించారు. సోనియా గాంధీ ఈ బిల్లుపై చర్చ లేదని అనడాన్ని తప్పుపట్టారు. “రాహుల్, ప్రియాంక గాంధీలు చర్చలో ఉన్నప్పుడు పార్లమెంట్‌లో ఉన్నారా? రాత్రి 3 గంటలకు లోక్‌సభలో, తెల్లవారి 4 గంటలకు రాజ్యసభలో బిల్లు ఆమోదం పొందింది” అని ప్రశ్నించారు.
మైనారిటీలకు న్యాయం ఎలా?
“వక్ఫ్ బోర్డులో మహిళలకు, వెనుకబడిన ముస్లింలకు స్థానం లేదు. ఈ సవరణ బిల్లుతో వారికి ప్రాతినిధ్యం ఇచ్చాం. ఇది తప్పు ఎలా అవుతుంది?” అని పురందేశ్వరి అడిగారు. రాజకీయ లబ్ధి కోసం ముస్లింల జీవితాలతో ఆడుకున్న పార్టీలకు ప్రజలు బుద్ధి చెప్పాలని ఆమె అన్నారు. వైఎస్ఆర్‌సీపీ రెండు చోట్ల వేర్వేరు వైఖరి చూపిందని కూడా విమర్శించారు.
