APY Scheme: వృద్ధాప్యంలో ఎలాంటి ఇబ్బంది లేకుండా గడపడానికి, చాలా మంది ప్రజలు పెన్షన్ పథకాలలో పెట్టుబడి పెడతారు. ప్రభుత్వం కూడా ఇలాంటి పింఛను పథకాన్ని అందుబాటులోకి తెచ్చింది. ఇందులో ఇప్పటి వరకు భారతదేశంలోని దాదాపు 6.9 కోట్ల మంది ప్రజలు పెట్టుబడి పెట్టారు. అటల్ పెన్షన్ యోజన (ఏపీవై) చందాదారుల సంఖ్య దాదాపు ఏడు కోట్లకు చేరుకుందని ఆర్థిక మంత్రి నిర్మలా సీతారామన్ బుధవారం తెలిపారు.
అటల్ పెన్షన్ యోజనలో గరిష్టంగా రూ. 5,000 నెలవారీ పెన్షన్, రూ. 60,000 వార్షిక పెన్షన్ అందుబాటులో ఉంది. అటల్ పెన్షన్ యోజన ప్రయోజనాలను తెలుసుకుందాం.ఎన్‌పీఎస్ వాత్సల్య యోజన ప్రారంభించిన సందర్భంగా ఏర్పాటు చేసిన కార్యక్రమంలో మంత్రి నిర్మలా సీతారామన్ మాట్లాడుతూ.. ఈ పథకం కింద జమ చేసిన మొత్తం రూ.35,149 కోట్లకు పెరిగిందన్నారు. ఏపీవై అనేది తక్కువ-ధర పెన్షన్ పథకం.
ఇది 60 సంవత్సరాల వయస్సు తర్వాత నెలవారీ కనీస పెన్షన్ రూ. 1,000-5,000 పెన్షన్ లభిస్తుంది. చందాదారుడు మరణించిన తర్వాత, అతని జీవితకాలం పాటు అతని జీవిత భాగస్వామికి అదే పెన్షన్ ఇవ్వబడుతుంది. చందాదారుడు, జీవిత భాగస్వామి మరణించినప్పుడు మొత్తం డబ్బు నామినీకి ఇవ్వబడుతుంది. 2015లో ప్రారంభించినప్పటి నుంచి 6.90 కోట్ల మంది అటల్ పెన్షన్ యోజనకు సభ్యత్వం తీసుకున్నారని, రూ.35,149 కోట్ల నిధులు జమ అయ్యాయని ఆమె తెలిపారు.
మీరు పదవీ విరమణ తర్వాత ప్రతి నెలా గరిష్టంగా రూ. 5,000 పెన్షన్ పొందవచ్చు. చెల్లించాల్సిన మొత్తం వయస్సును బట్టి మారుతుంది. చేరే వయస్సును బట్టి.. చెల్లించే మొత్తాన్ని బట్టి పింఛను రూ. 1000 నుండి గరిష్టంగా రూ. 5 వేలు వస్తాయి. 18 ఏళ్లు నిండిన వారు 60 ఏళ్లు అంటే 42 ఏళ్ల వరకు ఈ పథకం కింద చెల్లింపులు చేయాలి. 18 ఏళ్ల వయసులో ఈ పథకంలో చేరిన వారికి.. రూ. 42 నుండి గరిష్టంగా రూ. 210 చెల్లించాలి. 18 ఏళ్ల నుంచి 60 ఏళ్ల తర్వాత పెట్టుబడి పెట్టే వారికి నెలకు 5 వేలు పింఛను లభిస్తుంది. మీరు 40 సంవత్సరాల వయస్సులో చేరినట్లయితే, మీరు 20 సంవత్సరాల పాటు రూ. 291 నుండి రూ. 1454 చెల్లింపు చేయాల్సి ఉంటుంది. అప్పుడు 60ఏళ్ల తర్వాత 5 వేలు పెన్షన్ వస్తుంది.
అటల్ పెన్షన్ యోజన అంటే ఏమిటి?
వృద్ధాప్యంలో ఆదాయ భద్రత కల్పించేందుకు ప్రభుత్వం 2015-16 బడ్జెట్‌లో అటల్ పెన్షన్ యోజనను ప్రవేశపెట్టింది. ఈ పథకం ద్వారా ప్రభుత్వం సామాన్య ప్రజలను, ముఖ్యంగా అసంఘటిత రంగంతో అనుబంధం ఉన్నవారిని వీలైనంత వరకు పొదుపు చేసేలా ప్రోత్సహిస్తోంది. ఈ పథకాన్ని పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీ (PFRDA) నిర్వహిస్తోంది.
ప్రతి నెలా రూ.5,000 పింఛను
అటల్ పెన్షన్ యోజన కింద చందాదారులకు నెలవారీ రూ.1,000 నుంచి రూ.5,000 వరకు పెన్షన్ లభిస్తుంది. భారత ప్రభుత్వం కనీస పెన్షన్ ప్రయోజనానికి హామీ ఇస్తుంది. కేంద్ర ప్రభుత్వం చందాదారుల సహకారంలో 50 శాతం లేదా సంవత్సరానికి రూ. 1,000, ఏది తక్కువైతే అది జమ చేస్తుంది. ఏ చట్టబద్ధమైన సామాజిక భద్రతా పథకం కిందకు రాని.. పన్ను చెల్లింపుదారులు కాని వారికి ప్రభుత్వ సహకారం అందించబడుతుంది. ఈ పథకం కింద రూ. 1,000, 2000, 3,000, 4,000, 5,000 పెన్షన్ అందుబాటులో ఉంది. పెట్టుబడి కూడా పెన్షన్ మొత్తాన్ని బట్టి ఉంటుంది. చిన్న వయస్సులో చేరడం వల్ల ఎక్కువ ప్రయోజనాలు లభిస్తాయి.
